好多想申請高成數按揭的準業主都係新手，未必熟悉銀行按揭批核時間和流程，特別在疫情肆虐下可能影響銀行按揭批核的時間，趕住成交可以點做?
不妨睇睇以下流程，掌握銀行按揭批核的時間啦!
影響按揭批核時間4大因素
多數銀行按揭申請時間是一至兩星期，不過不少買家都偏向找大型銀行，貪其按揭業務穩健，或者考慮到按揭條款較優勝，咁樣都會吸引好多客交文件，處理時間自然耐點。如果你想申請高成數按揭，又要按揭保險獨立批核，時間最好預鬆點，例如多14日，計返約1個月左右就可得知批核結果。
有買家心急想盡快在2個月內成交，就會漁翁撒網式地申請多間銀行，不過由於銀行收到申請就會查閱TU信貸報告，而查閱後也會留下紀錄，如果被發現有向多間銀行同時申請按揭的話，有機會被質疑財務信貸問題，都會延長按揭批核時間架!
最緊要搵專業的按揭專員幫你跟進個案，即使你本身信貸評級唔錯，財務健康，只係申請低至40-50%按揭都好，為加強效率，有專人幫你跟會好好多。有個別客戶無事先預約，自行到銀行遞交申請，但分行職員未必直屬於按揭部，處理按揭文件自然也不夠熟悉，加上work from home，或者客戶無專責職員聯絡方法時，想問多點都有難度。
按揭批核時間最快14日
不少大型銀行都要2至3星期處理按揭批核，部分銀行就要長達1個月，視乎申請人情況:
| 銀行 | 審批時間 |
|---|---|
| 匯豐銀行 | 2 – 3星期 |
| 恆生銀行 | 2 – 3 星期 |
| 中國銀行 | 2 – 3星期 |
| 渣打銀行 | 2 – 3星期 |
| 花旗銀行 | 2 – 3星期 |
| 東亞銀行 | 2 – 4星期 |
| 富邦銀行 | 2 – 4星期 |
| 集友銀行 | 2 – 4星期 |
| 交通銀行 | 2 – 4星期 |
| 南洋商業銀行 | 2 – 4星期 |
| 中國工商銀行（亞洲） | 2 – 4星期 |
| 創興銀行 | 2 – 4星期 |
| 中信銀行 | 2 – 4星期 |
| 招商永隆銀行 | 2 – 4星期 |
| 華僑永亨銀行 | 2 – 4星期 |
加快按揭批核方法
1. 主動交齊文件。萬一銀行職員要求補交，一來一回也浪費時間。
- 臨時買賣合約
- 最近3個月有效住址證明
- 身分證明文件
- 最近3個月銀行月結單 （如薪金浮動，需要提供6個月）
- 最近3個月糧單 （如薪金浮動，需要提供6個月）
- 最近一年稅單
- 強積金供款紀錄
- 水電或煤住址證明
如果要申請埋按揭保險，除了以上之外，有可能要準備埋公司僱傭合約佢證明薪金收入，有些買家工作係以支票形式出糧，就要出示6個月入息證明，而提交支票證明時，最好是公司名義的 ; 自僱人士則要提供審計報告和公司利得稅單。
2. 選擇一些宣稱批核時間較快銀行，不過一些比較冷門的銀行都可考慮，皆因銀行都要跑數，批核過程或會順暢些。
3.直接找按揭專員，為免逐個部門轉交你的文件，咁做會簡單直接得多，不論是跟進個案還是遞交文件，理論上都比一般職員快。
4. 可向銀行申請預批。有機會申請預批時間會耐過一般按揭，不過只要你預好時間，睇樓同時預批，假如一簽臨約，仲未完成好預批申請，可以試下同銀行講，將預批改為正式申請。不過記得事前問清楚銀行做法先。
5. 申請多1-2間銀行按揭之餘，揀返被大部分銀行納入認可名單的律師樓。
6. 有被裁員風險的僱員要準備全面的入息證明文件。在疫情下，基於風險管理，銀行有機會對個別行業人士收緊按揭審批，當然每間銀行做法唔同，例如匯豐就要3至6個月入息證明，恆生就要3個月至2年。如果你是一般固定收入人士，例如公務員，入息證明的年期相對地較少，通常3個月已可。
如果係公務員，有固定收入，咁通常提供最近3個月入息證明就得。至於自僱或收佣加底薪的agent，入息證明更嚴格，要求年期會更長。曾有一些非固定收入的申請人故意要求公司將佣金延遲發放到戶口，希望想借得更多貸款，但或會被要求更長的年期證明。
如申請低成數按揭，使唔使交稅單和MPF證明?
如果你想申請低成數按揭，例如60%或以下，有些中小型銀行會接受3個月自動轉帳或支票出糧紀錄，唔一定要交齊稅單同MPF，不過後者留意最好用公司名義出支票，以免影響按揭申請。相反，如果想申請高成數按揭，但撞正轉工，出糧證明不足3個月，自然也增加難度。
成交期可唔可以多過3個月?
理論上不太適合拖長成交期，因為信貸報告有效期為3個月，若超過90天成交期，銀行按揭或要重新批核，令時間大失預算。一般2至3個月己可。
事先將花紅計算入息，會否增加按揭批核成功率?
事先將花紅計算入息，會否增加按揭批核成功率?
不少銀行都會視乎個別情況，而釐訂把多少花紅計算入息，所以不要單純地以為巨額花紅可以提升供款能力，建議及早做預先批核，安排好成交時間。
0 comments